في لحظة وانا غافي صحيت بدقة الجوال

قصيدة مؤثرة جدا .. تحطمـ الأحلامـ على صخرة الواقعـ






على ذاك الوعد واهل الوعد والحب راح البال
يزور اللي ترك قلبي مع همه وخلاني


معي له دمعتين وجرح ينزف له وحظآ مال
وتسابق خطوتي له جمرة الشوق وتعداني


وأنا كلي تعب حزن وسهر فيني .. وراس المال
عطش ذيك اللهاة اللي ضماها يجرح لساني


وأقلب فالقصيد اللي عليه من الملام جدال
علامه يوم ذكرني وليفي لين بكاني


ذكرت الماضي اللي فات يوم ان الفرح موال
أنا وخلي انتسامر به وغنيته وغناني


وذكرت المرتين اللي تلاقينا وطاب الفال
جلس جنبي وحبيت اليدين وهز وجداني


وقال إني أحبك ما أبي غيرك ولا رجال
علي الله وأمانه ما اتناسى لو تناساني


تشابكنا اليدين اللي رويناها دفا ووصال
على درب السعد منيت عينه يوم مناني


وبنينا حلمنا بين الشجر والظل والشلال
تحت غيم الأمل اهديت روحه كل تحناني


رسم فستان والطرحه على وجه القمر تختال
وقال إنه لأجل ذاك الزفاف إن الله أحياني


وشاورني بأساميهم إذا ربي رزقنا عيال
"عبد الله" و"سارة" أبا أسمي قرة أعياني


سهرنا ثم سهرنا ثم سهرنا نرسم الآمال
كذا والا كذا .. أحلى كذا .. خله علشاني


وفي لحظه وأنا غافي صحيت بدقة الجوال
على الصوت الحزين اللي يناديني وينخاني


يقول إلحق أبي ظلك قبل قبري يصير ظلال
وقف دونك بني عمي وأشوف الموت يبراني


وقلت أرجوك لاتمزح بلا ضحك وبلاش هبال
حلف بالله وثم والله صحيحا كل ماجاني


بغيت أنهض ورجلي ماقوت تاقف ولا تحتال
حرام إنه قطع قلبي قبل لا يعقد لساني


دخيلك عي لا ترضى ترى دمعي من أجلك سال
أنا اللي أزهمك تكفى دخيلك .. جف شرياني


وصاح الصيحه اللي من بعدها فالحشا لازال
يردد لي صداها موت حلمي به ويمحاني


حاولت بكل ما أملك أرده والرجال جبال
حدوني عنه والفرقا لها ذيب تعشاني


ضياع الحلم في يوم على قلبي مثل زلزال
معرضني متاهات الزمان وعشت بأحزاني


هذاك اللي مضى واللي مضا لي يابري الحال
يتل القلب تل ويحيي أشواقي وتبلاني


وأنا مابي "عبد الله" وما ابي سارا بلااااااااش أطفال
أبي أم لهم راحت بغية واحد ثاني



منقول